之前同大家講過，中國第一部漢英詞典並非西方專家嘅手筆，反而係响香港學英語嘅買辦商人唐廷樞所寫。唐廷樞一生成就頗為豐碩，被譽為中國第一位現代買辦、中國民族保險業之父等，佢先後參與發展招商局、主持修建唐胥鐵路等，對洋務運動嘅發展貢獻良多。1892年10月7日，61歲嘅唐廷樞於天津病逝。當時北洋通商大臣李鴻章親自主持葬禮，並評價「中國可無李鴻章，但不可無唐廷樞」。

話說有次唐廷樞搭船，諗住從上海到香港，途中遇到風浪，令行程受到延誤。為咗避免無水用，外國人船主規定每個中國旅客只能獲分半杯水，洗面、洗手或解渴都靠呢半杯。唐廷樞當時見到，船上成班羊咩咩有一桶桶嘅水隨便飲，令佢當堂有種「人不如羊」嘅慨歎。

唐廷樞曾經入讀香港馬禮遜學堂，因而講得一口流利英文。佢畢業後曾經任職拍賣行、政府翻譯、開當鋪等，並於1863年成為怡和洋行嘅總買辦。後嚟佢應李鴻章邀請，加入招商局並進行改組，第二年招商局就賺成8萬兩白銀，利潤非常可觀。

唐廷樞1892年逝世後，佢嘅靈樞從天津被運回鄉下，即現今珠海唐家村。當時13國駐津領事館下半旗致哀，以紀念唐廷樞嘅貢獻。

原圖取自網絡。